Nagpadayon karon ang pag-atubang sa lokal nga panggamhanan sa Jose Abad Santos, Davao Occidental sa sunod-sunod nga kalamidad nga nakaigo sa ilang lungsod, sugod sa kusog nga linog niadtong Hunyo 8, 2026 hangtod sa bag-o lang nga pagbaha ug landslide.
Matud ni Municipal Information Officer Julie Marie Muda Buen, usa kini ka dako nga pagsulay alang sa lokal nga panggamhanan ug sa mga residente tungod kay wala pa hingpit nga nakabangon ang komunidad gikan sa kadaot sa linog sa dihang misunod ang grabeng pagbaha ug landslide.
Bisan pa niini, gipasalig ni Buen nga padayon ang paningkamot sa lokal nga panggamhanan sa paghatag og tabang ug suporta sa mga pamilyang naapektuhan, samtang gipalig-on usab ang mga programa sa disaster preparedness ug emergency response aron mas mapanalipdan ang katawhan batok sa umaabot nga mga kalamidad.
Giduso usab sa opisyal ang kooperasyon sa mga residente pinaagi sa pagsunod sa mga pahimangno sa mga awtoridad ug aktibong pag-apil sa mga lakang sa kaluwasan aron mapaspasan ang pagbangon sa komunidad.
Samtang niini, nagpadayon ang monitoring ug assessment sa lokal nga panggamhanan aron mahibal-an ang tinuod nga kahimtang sa mga apektadong lugar ug masiguro nga mahatagan dayon og hustong tabang ang tanang nanginahanglan.
