GENERAL SANTOS CITY – Gihingusgan sa grupo sa mga job order workers sa Dr. Jorge P. Royeca Hospital nga supak gayud sila nga ipailawom sila sa agency.
Dungan kini sa gipahigayong silent protest sa anaa sa 66 ka mga apektado nga JO workers, kung asa matud pa sa ilang tigpamaba nga si Feliciano Morillo, usa usab ka JO sa nasampit nga tambalanan, palpak ug sayop ang mga diskarte sa pagdumala sa ospital ni Glenville Gonzales, overseer sa Dr. Jorge P Royeca Hospital.
Una nang giklaro ni Gonzales nga ang naasoy’ng lakang ang alang sa kaayuhan sa mga nasampit, ug aronm kahatagan sila ug kasiguruhan ang security of tenure, butang nga dili mahatag sa gobyerno sa mga nahisgutan lakip ang uban pang benepisyo nga gi-enjoy sa mga regular emloyees.
Apan gikwestiyon sa grupo nganong kinahanglan pa man ug agency nga mugasto man gihapon ug dakong kantidad nga salapi gumikan negosyo man ang agency.
Sumala pa ng kulang na man gani ang ilang ginadawat nga benepisyo, apil ang mga gamit nga gikinahanglan nila sa trabaho, nganong magpa-agency pa man nga makigbahin pa hinuon sa pondo o bayad nga alang unta kanila ug sa mga gikinahanglan nga gamit.
Samtang kon maghisgot matud pa ug maayong serbisyo, naghinobra matud pa sila sa pagtrabaho gumikan kulang sila itandi sa mga pasyente nga kinahanglan nilang serbisyuhan.
Lakip usab sa ilang gialmahan gumikan kinahanglan na usab nilang mu-apply sa agency kung asa ubay-ubay ang mga rekositos, ug kinahanglan una nilang magsumite ug resignation sa HRMDO sa City Mayor’s Office.
Gumikan niini, malaumon matud pa sila nga mapaminawan sa mga konsehal ug ni Mayor Ronnel Rivera ug matabangan sa ilang mulo.
