Usa ka Japanese fan ang nag-atubang sa posibleng kaso sa sexual harassment human mihalok sa labing karaan nga miyembro sa sikat nga South Korean boy band nga BTS, nga si Kim Seok-jin, nga walay pagtugot sa usa ka fan event sa miaging tuig, sumala sa mga otoridad sa South Korea .
Matod sa SoKor police sa Songpa station sa Seoul, gipatawag ang Japanese national aron imbestigahan nunot sa online complaint nga ilang nadawat.
Wala gibutyag sa police station ang identity sa Japanese national tungod sa privacy concerns, bisan pa nga base sa mga report sa media, gikompirma sa kapulisan ang identity sa maong babaye pinaagi sa tabang sa Japanese police, diin kini nagpangidaron og 50 anyos kinsa nagdumili sa pag-atubang sa pagpangutana.
Bisan pa niini, ang South Korean Police naglunsad og imbestigasyon sa reklamo ug nagdumili sa paghatag og dugang nga mga detalye samtang nagpadayon pa ang imbestigasyon.
Gikonsiderar sa mga imbestigador nga ipatawag si Jin aron mohatag sa iyang pamahayag isip biktima sa kaso.
Una niini, ang insidente nahitabo dungan sa libreng gakos nga kalihokan sa BTS nga gipahigayon sa Seoul niadtong Hunyo 2024 isip selebrasyon sa iyang pagkompleto sa mandatory military service ug sa ika-11 nga anibersaryo sa BTS.
Ang insidente nga nag-viral online nakuhaan sa video footage diin makita nga dili komportable ang South Korean star human kalit nga gihagkan sa aping sa fan nga nalambigit sa kalihokan nga gitambongan sa gibana-bana nga 1,000 ka Army fans.
