Nagpasalig ang Japan nga mohatag og 80 milyon ka barrels nga lana gikan sa ilang Strategic Petroleum Reserve aron suportahan ang global nga pag-apod-apod sa 400 milyon ka barrels sa merkado, matud ni Hannah Galvez, Bombo International Correspondent sa Japan.
Sumala pa niya, ang ihatag nga lana gikan sa emergency stock ug dili sobra sa production sa Japan. Giandam kini aron matabangan ang global market sa lana, ilabi na karong nagpadayon ang krisis sa Middle East, ug aron mapugngan ang sobra taas nga presyo nga makaapekto sa ekonomiya sa daghang nasod.
Gipahibalo usab ni Galvez nga dili mahurot ang supply sa Japan tungod kay ang Strategic Petroleum Reserve giandam alang sa emergency situations, busa luwas gihapon ang lokal nga panginahanglan samtang nagtabang sa global market.
Ang global intervention gilauman nga makahatag og temporaryo nga kaluwagan sa presyo sa lana ug masiguro nga dili magsalig lang ang tibuok kalibutan sa pipila ka nasod sa supply sa langis.
