GENERAL SANTOS CITY – Padayong nagpaalim sa Dr. Jorge P Royeca Hospital ang usa ka janitor sa usa ka unibersidad dinhi sa dakbayan human gidunggab sa mga batang sukarap.
Giila ang biktima nga si Alaidin Abusama Jr., 21 anyos, residente sa Balimbing St. Brgy Dadiangas North ning siyudad.
Nasayran nga miaging gabii, samtang gabaktas ang biktima ug pipila ka kauban sa Laurel St. sa nasampit gihapon nga barangay, kalit matud pa silang gigukod sa mga suspek hinungdan nga nagkatibulaag.
Apan naabtan matud pa ang biktima dapit sa usa ka kan-anan, ug kalit gidunggab sa mga suspek dayon paspas nga misibat.
Nakaangkon ug samad-dinunggaban sa likod ang biktima, ug kasamtangang giatiman sa mga doktor sa naasoy’ng ospital.
Giimbestigahan na sa kapulisan ang naasoy’ng insidente.
