Kapin sa 1,000 ka mga kabalay ang hingpit nga na-guba sa Zeitoun ug Sabra nga mga kasilinganan sa Gaza City sukad sa pagsugod sa Israeli military invasion niadtong Agosto 6, base sa pahayag sa Palestinian Civil Defence.
Matud sa ahensya, gipangubkob sa Israeli forces ang dagkong bahin sa syudad, ug daghang mga tawo ang gituohang nabilin ilawom sa kagubot ug debris. Apan tungod sa padayon nga pagpamomba ug kababag sa access routes, lisod para sa mga emergency responders nga makasulod ug makaresponde sa mga panawagan sa tabang.
Sa laing bahin, nagpabilin nga puno ug wala nay halos katabang ang mga ospital, samtang ang kagutum nagkagrabe matag adlaw.
Ang Ministry of Health sa Gaza nagtaho nga walo pa ka tawo ang namatay tungod sa kagutom nga gipahinabo sa Israeli blockade — nagpaabot sa ihap sa mga namatay tungod sa malnutrition ngadto sa 289, lakip na ang 115 ka mga bata.
Gikompirma usab sa mga report nga ginapamusil sa Israeli forces ang mga gutom nga Palestinian samtang naningkamot silang makakuha og hinabang gikan sa mga aid distribution sites nga gioperahan ubos sa GHF, nga gi-suportahan sa Israel ug Estados Unidos.
Samtang nagpadayon ang tensyon, nagsugod na og pagsulod ang mga Israeli tank sa Sabra, nga gituohang timailhan sa plano nga kompletohon ang okupasyon sa Gaza City. Tungod niini, hapit usa ka milyon ka Palestinian ang napugos nga mipabalhin paingon sa habagatan, palayo sa gubat.
Ang Palestinian Civil Defence mitumbok nga base sa ilang obserbasyon, ang kahimtang nagpadayag nga posibleng plano sa Israel nga hingpit nga bangkarutahon ang Gaza City, sama sa nahitabo sa Rafah.
Kini, matud sa mga human rights groups, basin kabahin sa intensyon nga hingpit nga pagpahawa sa mga Palestino gikan sa Gaza Strip.
