Nagpagawas og hugot nga pasidaan ang Islamic Revolutionary Guard Corps batok sa bisan unsang pagsulay nga pag-atake sa Iran.
Gihimo ang maong pasidaan sa wala pa ang himuon nga lubong sa namatay nga Supreme Leader sa Iran nga si Ayatollah Ali Khamenei.
Gipasidan-an sa IRGC ang mga kaaway sa Iran, ilabina ang United States ug Israel, nga likayan ang bisan unsang “sayop nga kalkulasyon” o pag-atake samtang nagbangutan ang nasod.
Gipahayag sa IRGC nga ang bisan unsang agresyon tubagon nila og mas determinado ug mas makaguba nga aksyon nga wala pa matod pa masinati kaniadto.
Sa pagkakaron, gibutang na sa labing taas nga lebel sa combat readiness ang tibuok sandatahang kusog sa Iran ubos sa pagpanguna sa ilang bag-ong Supreme Leader nga si Mojtaba Khamenei.
Si Ayatollah Ali Khamenei namatay sa mga pag-atake sa mga eroplano sa United States ug Israel niadtong Pebrero 28, 2026, sa pagsugod sa gubat.
Ang opisyal ug dako nga pagpasidungog alang sa namatay nga Supreme Leader sa Iran magsugod karong Sabado, Hulyo 4, hangtod Hulyo 9, 2026.
Gilauman sa gobyerno sa Iran nga mokabat sa 10 hangtod 20 ka milyon ka mga tawo, lakip ang mga langyawng delegasyon, ang motambong sa seremonya. Tungod niini, mas gipahugot pa ang seguridad ug gipasira usab ang pipila ka airspace sa nasod.
