Gisiguro ni incoming Manila Mayor Isko Moreno nga iyang palagputon sa trabaho ang mga opisyal ug empleyado sa City Hall nga mapamatud-an nga nalambigit sa kurapsyon.
Kini ang pasidaan ni Moreno sa iyang pormal nga paglingkod isip mayor sa Manila karong Hunyo 30.
Misaad si Moreno nga iyang sugdan pagbalik ang reporma sa ilang lokal nga kagamhanan.
Giklaro usab niya nga dili kini pagpanimalos sa iyang mga kaatbang sa politika kondili kinahanglan lang niya nga tangtangon ang mga opisyal nga dili epektibo sa ilang trabaho.
Nasayran nga pipila sa mga department head ug bureau chief ang nangandam na sa pagkanaog sa ilang puwesto.
Ang mga opisyal nga matinud-anon ug episyente magpabilin sa ilang mga posisyon bisan pa sa ilang pag-apil sa miaging administrasyon.
Subling gipasalig ni Moreno nga mahibalik ang limpyo nga Manila ug matinud-anon nga pagdumala.
