Sa pagsulod sa ikaunom ka adlaw nga pagbinayloay sa mga pag-atake tali sa Israel ug Iran, nagpasidaan ang Supreme leader sa Iran nga si Ayatollah Ali Khamenei sa pagsugod sa usa ka gubat tali nila ug Israel.
Sa usa ka post sa X, ang lider sa Iran miingon nga sa “ngalan sa bantugan nga Haidar, magsugod ang gubat”. Ang Haidar mao ang ngalan nga sagad gigamit alang sa Ali, nga giisip sa mga Muslim nga una nga Imam ug manununod sa propeta nga si Mohammed.
Ang Iranian supreme leader mipasalig usab sa grabeng pagbalos batok sa iyang gitawag nga teroristang Zionist regime ug miingon nga dili sila magpakitag kaluoy sa mga Zionista.
Sa sayo pa, ang Presidente sa US nga si Donald Trump nag-demand sa Iran sa pagsurender nga walay kondisyon ug miingon nga dili nila patyon ang Iranian Supreme Leader sa pagkakaron.
Ang Group of 7 kon G7 diin miyembro ang America nanawagan usab sa Iran nga mag-de-escalate.
Sumala sa wala hinganli nga mga opisyal sa US, gitimbang ni Trump ang ideya sa paggamit sa mga US military assets sa pag-atake sa mga nuclear facilities sa Iran, samtang ang usa ka taas nga opisyal miingon nga ang Israel nasuko kung ang Presidente sa US motabang sa pagtapos sa trabaho sa pagbungkag sa nuclear program sa Iran.
Kaniadtong Miyerkules sa buntag, giingon sa Israel nga naglusad kini og usa ka serye sa mga strikes sa Tehran.
Gipasidan-an usab ang mga Israeli sa umaabot nga mga missile gikan sa Iran pagkahuman nadungog ang mga pagbuto sa Tel Aviv pagkahuman daghang mga missile sa Iran ang nakasulod sa Iron Dome sa Israel.
