Gipahibalo ni U.S. President Donald Trump, sa iyang post sa Truth Social nga ang Iran kuno nangayo og ceasefire gikan sa Estados Unidos, apan ang Washington mo-insister nga motuman lang sila kung maablihan ang Strait of Hormuz.
Apan hugot nga gihimakak sa Iran ang pahayag ni Trump. Sumala sa tigpamaba sa Iranian Ministry of Foreign Affairs, ang pasangil sa hangyo sa ceasefire bakak ug walay basehan.
Mahinumduman nga ang bag-ong Supreme Leader sa Iran mao si Mojtaba Khamenei human namatay ang iyang amahan sa usa ka air strike sa miaging bulan, samtang si Iranian President Masoud Pezeshkian naa sa pwesto sukad Hulyo 2024.
Dugang ni Trump nga ang Estados Unidos mokonsiderar og ceasefire kung ang Strait of Hormuz “open, free, and clear”,apan sa pagkakaron nagpadayon ang operasyon batok sa Iran.
Ang Strait of Hormuz usa ka pig-ot nga strait tali sa Persian Gulf ug Arabian Sea diin moagi ang daghang porsyento sa mga kargamento sa lana ug gas sa tibuok kalibutan.
Ang pagbukas o pagsira niini adunay halapad nga epekto sa pangkalibutanong ekonomiya ug seguridad, human kaniadto nakaapekto sa Pilipinas pinaagi sa sunod-sunod nga dagkong pagsaka sa presyo sa lana sa nasud, uban sa deklarasyon ni Presidente Ferdinand Marcos Jr. sa State of National Energy Emergency.
