Nanawagan si Iranian President Masoud Pezeshkian sa mga nasod nga Muslim nga palig-onon ang ilang relasyon aron supakon ang pagpangdaogdaog sa Israel ug Estados Unidos.
Nagtuo si Pezeshkian nga gustong magkabahin-bahin sa mga nasod sa Middle East ang Estados Unidos ug Israel.
Gipahayag niya ang maong panawagan atol sa iyang pakigtagbo sa defense minister sa Saudi Arabia, army chief sa Pakistan ug intelligence chief sa Turkey.
Andam matod pa ang Iran nga mosuporta sa pagpalig-on sa panaghiusa, seguridad ug kooperasyon tali sa mga nasod nga Muslim.
Gikondena usab ni Pezeshkian ang mga pag-atake sa Israel sa Gaza, Lebanon, Iran ug sa ubang bahin sa rehiyon.
Dugang pa niya nga wala sila nangayo og mga “nuclear weapon”, apan giangkon sa Iran nga adunay kini katungod sa pagpalambo sa malinawon nga mga kalihokan sa nuclear ubos sa ‘Nuclear Non-Proliferation Treaty’.
