Nagpalupad og sunod-sunod nga mga missile ang Iran padulong sa Israel sumala sa Israeli military, samtang nagpadayon ang tensyon sa Middle East.
Nagpatingog kini og air raid sirens sa nagkalain-laing lugar apil na ang Tel Aviv, diin nadungog ang mga pagbuto gikan sa interception ug adunay mga balay sa amihanang Israel nga nadaot tungod sa debris apan walay nataho nga namatay.
Taliwala sa eskalasyon, gibutyag ni US Pres. Donald Trump nga adunay “productive talks” sa Iran ug nalangan ang giingong plano nga pag-atake sa energy grid, apan gisupak kini sa Iran ug gitawag nga “fake news.”
Gipadayag sa Iran nga walay nahitabong negosasyon uban sa US ug mipasalig ang Revolutionary Guards nga ipadayon ang ilang operasyon batok sa mga target sa Amerika.
Samtang nagpadayon ang krisis, nag-usab-usab ang global markets diin nisaka ang presyo sa lana ug mikunhod ang pagsalig sa merkado tungod sa nagkasumpaki nga pahayag gikan sa Washington ug Tehran.
