Hugot ang gihimong pagpaningkamot sa Sarangani Province nga madeklara ang lungsod sa Glan nga pink o buffer zone sa African swine fever (ASF).
Matud pa kang Dr. Bernard Cababat, acting department head sa Provincial Veterinary Office nga nagsugod na sila sa trial sa paggamit sa “sentinel hogs” sa mga barangay nga apektado sa ASF.
Ang tumong niini nga madetermina kung may presesnya pa sa ASF sa lugar.
Gibutyag nga 66 ka mga gabuhi og baboy ang inisyal nga apil sa 40-day testing.
Samtang anaa sa 34 ka mga gabuhi og baboy usab ang muapil sa programa nga gikalangkuban sa Barangay Batulaki, Pangyan, Calabanit, Calpidong, og Cablalan sa Glan.
Kahinumduman nga nagsugod ang ASF outbreak sa maong mga barangay sa miaging Hulyo 2020 kung asa kapin sa 140 ka mga baboy ang gipailawom sa culling.
Ang pink o buffer zone ang nagpasabot nga wala nay presensya sa ASF.
Ang mga baboy nga apil sa sentinel program ang dili ibaligya o ihawon.
