GENERAL SANTOS CITY- Padayon ang ginahimo nga internal cleansing sa mga sakop sa Philippine National Police.
Ug gani, dinhi sa Region 12, gitangtang sa serbisyo ang pito ka pulis gumikan matud pa sa pagpanikas matud pa ug wala paghimo sa ilang trabaho.
Sa pakighinabi kang Police Supt. Aldrin Gonzales, tigpamaba sa Police Regional Office 12, ang naasoy’ng ihap ang gikan Enero hangtod Hulyo ning tuiga, kung asa upat sa mga nahisgutan ang gikatakda na untang magretiro.
Matud pa nga tungod kini sa pagsumite ug peke nga mga dokumento, samtang ang uban ang nag-AWOL o absent without official leave.
Nasayran nga adunay 46 ka mga pulis nga ang-atubang ug kaso sa rehiyon, kung asa 18 matud pa kanila ang suspendido.
Duha matud pa sa mga nahisgutan ang may ranggo nga SPO4.
