GENSAN- Posibleng anam-anam nang mikunhod ang interes sa publiko sa impeachment trial ni Vice President Sara Duterte tungod sa kadugayon sa mga proceedings ug sa kanunay nga pagkasuspenso niini.
Matud ni Professor Andy Villa sa Mindanao State University, namatikdan usab sa ubang analysts ang gitawag nga “impeachment o trial fatigue,” diin mahimong kapuyon ang publiko sa padayong pagsubay sa pagdungog.
Iyang giingon nga posibleng nakaapekto usab ang pagbag-o sa iskedyul sa hearing, ilabi na karon nga mas sayo kini magsugod ug matapos sa hapon, kumpara kaniadto nga moabot pa sa alas dos sa hapon ang pagsugod sa proceedings.
Sumala ni Villa, daghang mga tawo ang nagtrabaho ug adunay kaugalingong mga buluhaton, busa dili kanunay makasubay sa impeachment trial.
Gipunting usab niya nga daghan pa og laing gikabalak-an ang publiko, ilabi na kadtong naapektuhan sa mga bagyo ug linog.
Busa, posible nga dili lang ang kakapoy sa dugay nga pagtaral ang hinungdan sa pagkunhod sa pagsubay sa publiko, kundili apil usab ang ilang pagtagad sa mas dinaliang mga problema sa ilang pang-adlaw-adlaw nga kinabuhi.
