GENERAL SANTOS CITY – Wala gipadaplin sa kapulisan ang posibilidad nga may inside job ang nahitabo sa pagpanulis sa J & T Express nga nahimutang sa Recto St., Dadiangas North ning dakbayan.
Matud pa kang Police Major Ananias Vasquez, hepe sa Pendatun Police station nga ilang gipatawag ang mga empleyado aron masayran ang sitwasyon sa operasyon sa maong kompanya.
Gibutyag nga sa pagsulod sa mga responsable sa opisina mideretso kung asa nakabutang ang kwarta.
Usa sa mga gihuptan nga ebedensya sa kapulisan ang video sa CCTV camera ingon usab ang testimonya sa mga empleyado.
Matud pa ni Vasquez nga walay gwardya og walay vualt usab ang maong establismento nga makahatag og seguridad.
Gibutyag nga dul-an sa P1 million ang nakuha sa mga responsable sa maong insidente.
Nasayran nga kini ang ikaduhang higayon na nga gitulis ang J & T Express nga ang una sa miaging Disyembre 2020 samtang didto pa sa Quirino Avenue ang maong establismento.
