GENERAL SANTOS CITY – Dili kinahanglan nga may personal nga kahibalo ang usa ka nagpasang-at ug impeachment complaint kalabot sa iyang alegasyon.
Kini ang gibutyag ni Atty Teodoro Sales, inilang abugado dinhi sa dakbayan, may kalabutan sa pagkabasura sa gipasang-at ni Rep. Gary Alejano sa kongreso nga impeachment complaint batok kang Pangulong Rodrigo Duterte, kagahapong adlawa, sa rason nga “insufficient in substance” matud pa kini.
Matud kang Atty Sales, dili kinahanglan nga may personal nga kahibalo si Alejano sa gipasang-at nga impeachment complaint gumikan ang mahinungdanon nga may mga testigo nga makapamatuod sa mga alegasyon.
Sumala pa nga ang impeachment complaint usa ka political process o war on numbers kon sa numero magdaog ug dili base sa ebidenysa.
Hinungdan nga kon gamay ang numero sa nagpasang-at, lauman gayud nga ma-dismiss kini.
Posible man matud pa kining makalusot isip “sufficient in form” apan “insufficient in substance”, butang nga maoy nahitabo sa pagdungog kagahapong adlawa.
Samtang, kalabot sa gipasang-at nga impeachment complaint sa International Criminal Court, lauman gihapon matud pa nga dili maglampos, gumikan base sa argumento sa panel ni Pangulong Duterte, niagi na ug proseso ug naimbestigahan na sa Kongreso ug Senado.
Nagpasabot kini nga may gihimo nang lakang ang hurisdiksyon sa Pilipinas.
Kahibaluan nga usa sa rekositos nga mapasang-at sa ICC ang impeachment complaint, ang kung mapamatud-an nga walay gihimo ang gobyerno sa reklamo sa mga nahimong krimen sa pangulo.
