Bumilis pa sa 4.1% ang inflation rate o antas o bilis ng pagtaas ng pangkalahatang presyo ng mga bilihin at serbisyo sa bansa noong Marso, ayon sa Philippine Statistics Authority (PSA).
Ito ay kasabay ng pagsipa ng presyo ng langis at transportasyon.
Ito ay mas mabilis kumpara sa 2.4% na naitalang inflation rate noong Pebrero ng kasalukuyang taon. Bahagyang lumagpas din ito sa 2% hanggang 4% target inflation na itinakda ng pamahalaan at sa forecast range ng Bangko Sentral ng Pilipinas (BSP).
Sa isang pulong balitaan ngayong Martes, Abril 7, inihayag ni PSA USec. at National Statistician Claire Dennis Mapa na ang inflation noong Marso 2026 ay pinakamabilis na naitala sa nakalipas na dalawang taon o mula Hulyo 2024 kung saan pumalo ang inflation sa 4.4%.
Isa sa pangunahing nakaambag sa overall inflation noong Marso ay ang transport commodity na nasa 9.9%, na pinakamataas sa nakalipas na tatlong taon.
Tumaas din ang presyo ng langis mula nang maglunsad ng digmaan ang US at Israel laban sa Iran noong Pebrero 28. Ayon sa PSA Chief, simula noon tumaas ang presyo ng gasolina, diesel gayundin ang singil sa kuryente.
