Nagpabiling nag-unang gikabalak-an sa mga Pilipino ang pagkontrol sa pagsaka sa presyo sa mga batakang palaliton.
Base sa survey sa OCTA Research nga gihimo gikan Hulyo 4 hangtod 11, 37 porsyento sa mga respondents ang miingon nga ang inflation o pagsaka sa presyo sa mga palaliton maoy usa sa ilang tulo ka labing dakong kabalaka.
Bisan pa niini, mikanaug kini og walo ka porsyento gikan sa 45 porsyento nga natala sa survey niadtong Marso.
Sa resulta sa survey, ang mga taga-Visayas ang adunay labing taas nga kabalaka sa inflation sa 42 porsyento, gisundan sa Balance Luzon nga adunay 41 porsyento.
Nag-una usab ang inflation isip labing dakong kabalaka sa Class ABC nga adunay 41 porsyento, gisundan sa Class E nga adunay 40 porsyento, ug Class D nga adunay 36 porsyento.
Ikaduha sa mga gikabalak-an sa publiko ang pagtaas sa sweldo sa 34 porsyento, samtang ikatulo ang pagpakunhod sa korapsyon nga adunay 32 porsyento.
Lakip usab sa ubang mga isyung gikabalak-an sa mga Pilipino ang pagpaubos sa presyo sa pagkaon, libre ug dekalidad nga edukasyon, pagsumpo sa ilegal nga droga, pagpaubos sa presyo sa bugas, paghatag og dugang nga oportunidad sa trabaho, ug pagpakunhod sa kakabos.
