GENERAL SANTOS CITY- Padayong giimbestigahan sa mga otoridad ang natigayong aksidente sa national highway Malapatan, Sarangani, nga gikamatay sa Indigenous People’s Mandatory Representantive sa nasampit nga munisipyo.
Dead on arrival si IPMR Alfredo Pandian, 49 anyos, taga-Tuyan, Malapatan, human makabangga ang motorsiklo nga gimanehuan ni Nico Asentida, 18 anyos, taga-Brgy Poblacion.
Kahibaluan nga nahitabo ang insidente atubangan mismo sa balay ni Mayor Alfonso Singcoy, kung asa pasulod na unta sa compound si Pandian dihang wala niini namatikdan si Asintida nga paspas usab ang padagan sa iyang motorsiklo.
Sa kakusog sa pagbangga, nalagpot si Pandian hinungdan nga napuruhan sa ulo. Gilayong gidala ang mga biktima sa balay-tambalanan apan pag-abot sa SOCSARGEN County Hospital, gideklarang dead on arrival si Pandian.
