Nakakuha na og permit ang mga miyembro sa Iglesia ni Cristo gikan sa Quezon City Government alang sa pagpahigayon sa ilang kilos-protesta.
Sumala sa Quezon City Department of Public Order and Safety (DPOS), wala sila’y pagsupak sa pagpahigayon sa malinawon nga protesta sa White Plains Avenue karong Hulyo 1.
Pagahimuon ang maong kilos-protesta gikan alas-8 sa buntag hangtod alas-8 sa gabii.
Adunay usab mga kondisyon nga kinahanglan sundon, lakip na nga ang kalihokan himuon lamang sa bahin sa White Plains Ave. sa Temple Drive, Quezon City.
Dili usab mahimong sirad-an ang mga karsada atol sa maong kalihokan, kinahanglan mapadayon ang kalimpyo ug kahapsay sa lugar, ug dili babagan ang mga lakang sa seguridad sa kapulisan ug lokal nga gobyerno.
Gipahinumdoman usab ang mga partisipante nga sundon ang mga balaod sa trapiko sa tibuok panahon sa kalihokan.
Gibanabana nga moabot sa kapin 100,000 ka partisipante gikan sa INC ang motambong sa maong protesta.
Gihinumdoman nga daghang trabahante, motorista ug mga pasahero ang naapektuhan sa kalit nga pagpahigayon sa kilos-protesta sa INC usa ka adlaw human ipahibalo sa Office of the Ombudsman ang pagpasaka og kasong plunder batok kang Senador Rodante Marcoleta.
