GENERAL SANTOS CITY– Nangayo og pakitabang ang usa ka inahan nga taga Malungon Sarangani Province aron mapauli gilayon sa Pilipinas ang anak niya nga usa ka housekeeper sa Saudi Arabia.
Kini human nga nagpadangat og sumbong dinhi sa Bombo Radyo si Analyn Palacay sa sitwasyon sa iyang anak.
Emosyonal niining gisaysay nga sugod niadtong Dominggo hangtod Lunes, wala gipakaon ang anak niya nga si Jessa Mae Palacay.
Nangayo lang unta og tabang ang anak niya sa amo niini human nga nagdugo ang ilong.
Gitago ang anak niya sa comfort room kung asa walay kaon hinungdan nga nakuyapan og didto lang usab nag-inom og tubig sa dihang gipagawas.
Pagkagabie niadtong Dominggo, nag-video call sila sa anak niya kung asa naghilak nga nangayo og pakitabang nga gilayong ma-rescue sa agency didto sa Riyadh.
Kagahapon nadala ang anak niya sa agency sa tabang og paningkamot sa iyang bayaw nga atua sa Saudi og sa uban pang OFW didto.
Apan gikasakit niya ang buot kay walay gihimo ang agency dihang gisagpa ang anak niya sa amo niini dihang gisultihan nga dili mag-istorya kung giunsa kini.
Gipaabot sa Bombo Radyo GenSan ngadto sa Dept. of Migrant Workers sa Koronadal ang sitwasyon ni Jessa Mae Palacay.
Sa gipaabot nga impormasyon ni Samsudin Lintongan, OIC Regl. Dir. sa DMW nga mitawag sa ilang buhatan ang agency nga nagpahibalo nga dalhon si Palacay sa Migrant Workers Office didto sa Riyadh karong adlawa alang documentation og pagproseso gilayon sa repatriation niini.
