GENSAN- Hilabihan nga kasubo ang gibati sa pamilya sa gipatay nga missing person nga si John Alexis “Arjay” Punla human makumpirmang patay na kini ug nakit-an ang iyang lawas sa mabangis nga kahimtang.
Sa pakighinabi, gipadayag sa iyang inahan nga si Belen Punla nga lisod kaayo alang kaniya ang pagdawat sa nahitabo sa iyang kamanghuran nga anak.
Matod niini, dili lamang ang pagkawala sa iyang anak ang nakapasakit kaniya, kondili usab ang paagi sa pagpatay niini nga iyang gihulagway nga hilabihan ka brutal ug walay kaluoy.
Gipasabot usab ni Belen nga wala sila mangayo og kuwarta o laing kondisyon, kondili hustisya lamang alang sa iyang anak.
Giingon niya nga malinawon ang ilang pamilya ug wala silay gitamakan o gipasakitan nga tawo, busa dili niya masabtan nganong nahimo ang maong krimen. Dugang pa niini, bag-o pa lamang usab siyang nabiyuda sa miaging tuig ug karon giatubang na usab niya ang pagkawala sa iyang kamanghuran nga anak.
Matod niya, kon nahibal-an pa lamang niya nga ing-ani ang mahimong dangatan sa iyang anak, wala na matod pa unta niya kini gipapauli sa Pilipinas. Si John Alexis “Arjay” Punla ang gikatahong nawala miadtong Hunyo 24 apan nakit-an na lamang kining gilubong sa kasagbutang bahin sa Brgy. Ligaya niadtong gabii sa Sabado.
Nasayran nga tulo ka suspek ang anaa na karun sa kustodiya sa mga otoridad human misurender Samtang, nagpadayon ang imbestigasyon sa mga otoridad aron mapanubag ang tanan nga responsable sa maong krimen ug mahatagan og hustisya ang biktima.
