GENERAL SANTOS CITY – Gapangita na og luna si Kagawad Ben Talon, kinsa Indigenous People kon IP Representative sa Sangguniang Panglungsod aron nga himuong IP Village alang sa mga kaigsuonang B’laan.
Kini human nga nagkaistoryahanay na si Sen. Manny Pacquiao og Kag. Talon kabahin niini kon asa nipasalig ang fighting senator nga tabangan ang mga Blaan dinhi sa dakbayan.
Sumala pa maghatag og P24 Million si Senador Pacquiao aron ipalit og luna.
Sa pagkakaron nagsugod na sa pagdetermina ang buhatan ni Kagawad Talon kon kinsa ang mga angayang benepisyaryo sa IP Village.
Gikabutyag nga aduna nay negosasyon nga nahitabo kon asa target nga magpalit og luna sa Brgy. Tambler o sa Bawing.
Una niini nagsumite si Kag. Talon og urgent resolution nga manghangyo sa senador og P24 million alang sa IP Village.
Gani, wala mapakyas si Kag. Talon human nga nipasalig gilayon si Sen. Pacquiao nga maghatag sa maong kantidad sa salapi atol sa ilang pag-istoryahanay dihang gipakigkitaan ang senador kauban ang mga konsehal sa lokal nga panggamhanan sa dakbayan pagkahuman ang Philippine Councilors League kon PCL sa Kauluhang Maynila..
Gikabutyag wala damha ni Kag. Talon nga bisan dili sila personal nga magkaila ni Sen. Pacquaio, gilayong gihatag sa senador ang iyang gihangyo butang nga gipasalamatan usab niini tungod dako kaayo kini nga tabang ilabina sa mga IP’s.
