GENSAN-Dili na maapas pa sa 19th Congress aron masugdan ang impeachment trial ni Vice Pres. Sara Duterte.
Matud ni Atty. Arturo Cloma, sama sa usa ka ordinaryong kaso nga gi-file sa korte, muagi usab og daghang ‘stages’ ayha masugdan ang impeachment proceedings.
Paghuman nga madawat sa Senado ang articles of impeachment kinahanglan una mag-convene aron maporma isip usa ka impeachment court og musunod ang pagpanumpa sa mga senador isip hukom.
Kun maporma na ang impeachment court ayha una pa mopagawas og summon kay VP Sara og kamandoan aron mupatim-aw sa Impeachment court.
Napulo pa ka adlaw ang mulabay gikan sa paghatag sa summon diha pa mutubag ang bise presidente bahin sa iyang impeachment.
Kun itandi sa ordinaryong kaso, adunay gitawag nga arraignment nga himuon sa impeachment kun asa basahan si VP Sara sa sumbong aron iyang tubagon kun ‘guilty’ o ‘not gulity’ siya.
Pagkahuman sa arraignment ipahigayon na dayon ang preliminary conference kung asa i-identify ang mga testigo nga usa-usa nga ipresenta sa witness stand.
Dili kini madali -dali nga proseso kay magdepende kung pila ka testigo ang ipresenta sa House Prosecution panel kung asa mulongtad og pipila ka mga bulan ang pagsunod sa mga proseso sa usa ka impeachment case.
Nasayran nga matapos na sa June 30 ang 19th Congress og adunay mandato nga adjournment sa Senado.
Ang presentasyon sa 7 ka articles of impeachment matigayon sa June 11 og ang nahibiling 3 ka semana sa Hunyo ang igo ra sa presentasyon hinungdan nga dako ang posibilidad nga sa 20th Congress na mahisgotan balik ang impeachment trial ni Vice Pres. Sara.
Sa bag-ong Kongreso bag-o na ang composition niini hinungdan nga magdesisyon pa gihapon ang mga senador kung kanus-a mag-convene para sa makamugna og impeachment court.
