Kinahanglang magsugod na ang impeachment trial sa higayon nga madawat na ang tubag ni Bise Presidente Sara Duterte sa gipatawag nga summon sa Senate Impeachment Court.
Matod ni kanhi Bayan Muna party-list Rep. Neri Colmenares, gihatagan sa Senate Impeachment Court og 10 ka adlaw si Duterte sa pagtubag sa gipatawag niini niadtong Hunyo 11.
Si Colmenares niingon nga bisan og gi-adjourn ang sesyon sa Senado, ang legislative mandate lang niini ang gisuspenso ug dili ang non-legislative mandates niini.
Matud pa ni Colmenares nga angayan sab nga tubagon dayon sa Kamara de Representantes ang mando sa impeachment court sa Senado nga ihingusog nga ang Articles of Impeachment nga gisang-at niini wala makalapas sa Konstitusyon ug andam nga ipadayon ang impeachment trial.
Ang kanhi kongresista niinsister nga katungod sa mga Filipino nga masayod giunsa paggasto ni Duterte ang iyang P612 milyones nga confidential funds ug kon tinuod ba nga napunta kini sa mga tawo sama ni Mary Grace Piattos.
