Makonsidera nga dismiss ang impeachment case batok kang Bise Presidente Sara Duterte kung dili mahuman ang husay sa dili pa ang Hunyo 30, 2025.
Kini ang gipahayag ni Senate Majority Leader Francis Tolentino sa iyang manifestation sa plenaryo sa Senado.
Matod ni Tolentino, dili makapasar sa 20th Congress ang impeachment trial tungod sa kakuwang sa constitutional authority.
Gipasabot pa niya nga 12 na lang ka mga senador ang nagpabilin sa Kongreso human sa eleksiyon ug dili pa kini igo aron maka-quorum.
Samtang, si Senador Risa Hontiveros nisupak sa pahibalo ni Tolentino.
Gitataw sa senador nga ubos sa 1987 constitution, gikinahanglan sa Senado nga ipadayon ang proseso sa impeachment nga nagsugod na sa walay paglangan.
Nabalaka ang senador sa balikbalik nga pagkalangay sa proseso sa impeachment trial.
Matod niya dugay na kaayong nagpaabot ang mga Pilipino ug nanghinaot ang senador nga mao na kini ang kataposang paglangan.
Bisan tuod ang senador niingon nga suportado niya ang pagpalabang sa mga importanteng balaudnon sa dili pa matapos ang 19th Congress, siya miingon nga ang ilang mga katungdanan ubos sa Konstitusyon dili na ma-postpone.
Gihatagan pa niya og gibug-aton nga ang bisan unsang paglangan sa pagsugod sa husay batok kang Duterte usa ka dayag nga paglapas sa Konstitusyon, nga klaro nga nagkinahanglan sa Senado nga sugdan dayon ang impeachment trial.
