GENERAL SANTOS CITY -May mga kompanya matud pa sa Seoul South Korea ang nagpatuman og lockdown tungod sa bahad sa coronavirus disease(covid) 2019.
Gibutyag sa Bombo Radyo GenSan ni Rona Nerpiol-Lacap, taga Alabel Sarangani Province og karon teacher sa Dwight International School of South Korea, wala na gitugtan sa ilang mga employer nga mugawas ang mga empleyado sa gitrabahuang factory og establisiemento kung asa daghan sa iyang mga higala nga mga Filipino ang naapektuhan.
Matud kang Lacap, may gi-release nga memorandum ang Seoul Metropolitan Government nga sugod ning adlawa hangtud Marso 9, 2020 sirado ang mga preschool kingarten sa mga public schools sa tibuok rehiyon aron makalikay sa gasamot nga kaso sa virus sa maong nasud.
Ang academic year sa mga Korean public schools ang magsugod unta sa nakalabay pa nga duha ka semana apan tungod sa covid 2019 gikansela una ang pag-abli sa klase. Gikansela usab ang pag-abli sa klase sa mga unibersidad sa Seoul.
Nasayran nga gibutang na ang South Korea sa labing taas nga alerto tungod sa coronavirus.
