Labing menos 20 ka mga tawo ang namatay ug kapin sa 170 ang naangol human ang Bangladesh Air Force fighter jet nahagsa sa usa ka eskwelahan sa Dhaka.
Ang insidente nahitabo sa Milestone School and College, usa ka pribadong eskwelahan.
Kadaghanan sa mga biktima mga batan-ong estudyante nga bag-o lang mibalik gikan sa klase sa dihang nahagsa ang F-7 BJI jet, diin hinimo kini sa China.
Sumala sa militar, ang piloto nga si Flight Lieutenant Towkir Islam anaa sa usa ka flight mission sa dihang nakasinati og mekanikal nga kapakyasan.
Nasayran nga mao kini ang una niyang solo flight, matod sa iyang uyoan.
Gisulayan pa unta sa piloto nga ipalayo ang eroplano palayo sa daghang tawo apan nahagsa gihapon kini sa school building.
Samtang, ang mga naangol, nag-edad tali sa walo hangtod 14, sumala sa ospital diin sila gidala.
Wala pa mailhi ang pito sa mga patayng lawas.
Daghang mga paryente ang midugok sa ospital, samtang ang mga volunteers nagpahigayon og blood donation drive.
Nagdeklara na og nasudnong pagbangotan ang gobyerno sa Bangladesh tungod sa nahitabo.
