Misaka na sa kapin 1,000 ka mga tawo ang namatay tungod sa grabeng pagbaha ug mudslide sa Nepal ug Tibet, sumala sa report sa mga otoridad samtang nagpadayon ang rescue operations sa mga isolated nga komunidad.
Base sa pinakabag-ong tala, dili moubos sa 1,010 ang kumpirmadong nangamatay sa Nepal diin anaa pa sa 3,916 ang gikatahong missing. Samtang gikumpirma sa China nga 16 ang namatay ug 546 ang missing sa ilang bahin.
Nagsugod ang trahedya niadtong miaging semana human sa glacial collapse sa Himalayas nga nagpahinabo sa pag-agas sa dakong volume sa yelo, bato ug tubig-baha padulong sa mga walog.
Sa briefing sa Foreign Ministry sa Nepal, gipahibalo sa tigpamaba niini nga gawas sa misaka nga ihap sa mga namatay ug kapin 4,000 pa ang missing, miabot na sa 11,800 ka mga tawo ang malampusong na-rescue.
Aron makatabang sa pag-ila sa mga lawas sa mga biktima, magpadala ang China ug Singapore og mga forensic expert, dugang nga DNA kits ug mga freezer.
Sumala usab sa Nepal Army, 23 ka mga indibidwal ang ilang na-rescue gamit ang aerial assets, samtang naglunsad og joint search operations sa giladmon nga 50 hangtod 200 metros sulod sa tulo ka hydropower plants.
Samtang, nag-organisar og memorial services ang mga emergency worker ug mga residente sa Tibet aron pagasubayon ang mga namatay. Nagpadala usab ang gobyerno sa China og relief supplies, lakip na ang mga drone ug water purification systems, ngadto sa mga apektadong lugar sa utlanan sa Nepal.
