Magpadayon ugmang adlawa Pebrero 26, 2026 ang confirmation of charges hearing batok kang kanhi Presidente Rodrigo Duterte sa International Criminal Court, human matapos ang pagsumite sa mga merito sa prosekusyon ug sa Common Legal Representative of Victims.
Sa miaging mga pagdungog, gipresentar sa prosekusyon ang ilang mga argumento ug ebidensya aron suportahan ang mga alegasyon batok sa kanhi pangulo. Gisundan kini sa pagsumite sa Common Legal Representative of Victims nga naglatid sa baruganan sa mga biktima nga nalambigit sa kaso.
Sa umaabot nga hearing, turno na sa depensa ang paglatid sa ilang mga merito ug pagbaton og higayon sa pagtubag sa mga alegasyon nga gipasukip batok kang Duterte. Gilauman nga ipakita sa kampo sa depensa ang ilang legal nga mga argumento aron supakon ang mga pasangil ug hangyoon ang korte nga dili ikompirma ang mga kaso.
Ang confirmation of charges hearing maoy kritikal nga bahin sa proseso sa ICC tungod kay dinhi pagahukman kon igo ba ang ebidensya aron ipadayon ang kaso ngadto sa pormal nga paglilitis. Sa higayon nga makompirma ang mga kaso, mosulod kini sa sunod nga yugto nga trial proper.
Padayon nga gitutokan sa lokal ug internasyonal nga komunidad ang kalamboan sa maong kaso samtang naghulat sa sunod nga lakang sa korte karong Huwebes.
