Gibasura sa Pre-Trial Chamber I sa International Criminal Court (ICC) ang apela sa kampo ni kanhi Presidente Rodrigo Duterte nga tangtangon sa hearing ang duha ka huwes nga nalambigit sa pagresolba sa isyu sa hurisdiksyon sa tribunal kalabotan sa kaso batok kaniya.
Kini ang nakalatid sa upat ka panid nga desisyon nga napetsahan nga Mayo 6 ug gipirmahan ni Presiding Judge Lulia Antoanella Motoc.
Kahinumdoman nga nag-file ang kampo ni Duterte ug apela sa hurisdiksyon sa ICC sa Pilipinas.
Sa maong adlaw, nag-file usab ang depensa ug usa ka “Invitation to petition the Presidency for a partial Excusal” nilang Judge Reine Adélaide Sophie Alapini-Gansou ug Judge María del Socorro Flores Liera gikan sa papel nila sa Pre-Trial Chamber I kalabotan sa isyu sa hurisdiksyon, tungod sa posibleng bias.
Una na nga giaprubahan sa duha ka mga hukom ang pagpahigayon ug una nga imbestigasyon batok kay Duterte.
