Kahadlok ug kalingawan ang gidala sa usa ka babaye human kini mikalit og ambak sulod sa usa ka atabay, samtang giingong hubog kini sa maong higayon.
Sumala sa mga nakasaksi, nagdula-dula ra unta si Joanna sa tubig sa dihang kalit lang siyang nakahunahuna nga molukso ug mosalom sa atabay.
Wala usab damha sa mga nakakita ang iyang kalit nga gibuhat. Matod sa nag-upload sa video nga si Loreza Legion Enero, sayo pa lamang sa buntag apan nag-inom na si Joanna ug tungod sa iyang pagkahubog, kung unsa-unsa na lamang ang iyang gihunahuna ug gisulti.
Matod pa niya, nasayran nila ang nahitabo dihang misinggit si Joanna ug giingnan sila ni Rachel nga naa na kini sa sulod sa atabay. Dali usab nga miresponde ang mga silingan aron siya matabangan ug makuha gikan sa balon.
Bisan pa sa kahadlok nga nahitabo, luwas ug malampusong nakuha si Joanna gikan sa atabay.
Pagkahuman sa ilang pagrescue, misulay matod pa si Joanna nga magpatihulog pag-usab sa atabay samtang nagpadayon sa pagsulti og mga dili klarong pulong. Wala usab gitahong grabeng kadaot nga iyang naangkon human sa maong insidente.
