Nangayo ang House prosecutors sa Senado isip Impeachment Court og upat ka dugang nga pre-trial measures aron masiguro ang hapsay, klaro ug episyenteng pagdumala sa impeachment trial ni Vice President Sara Duterte.
Sa ilang manifestation nga gisumite karong Miyerkoles, gisugyot sa prosecution ang paggamit sa Filipino ug English sa mga pagdungog, sayong pagbutyag sa listahan sa mga testigo, pagtugot sa publiko ug pribadong mga prosecutor sa pagsusi sa mga testigo, ug pag-abli sa nakaselyong kahon sa mga rekord gikan sa Bureau of Internal Revenue (BIR) nga anaa sa kustodiya sa korte.
Matud sa prosekusyon, makatabang ang maong mga lakang aron mapadali ang proseso sa pagtaral, malikayan ang mga procedural dispute ug mapadayon ang focus sa presentasyon sa mga ebidensya ug testimonya.
Gikatakda nga magsugod ang pormal nga impeachment trial sa Hulyo 6 samtang nagpadayon pa ang mga pre-trial proceedings.
