Wala pa’y pinal nga desisyon ang House prosecution panel kabahin sa una nga pag-share ni Senator-Judge Pia Cayetano og spliced ug gi-edit nga video nga may kalabutan sa nahitabong panagsangka sa pulong nila ni Sen. Alan Cayetano ug Rep. Chel Diokno atol sa impeachment trial.
Sa pakighinabi sa Bombo Radyo kang Lead Prosecutor Rep. Gerville Luistro, iyang gipadayag nga nahibalo ang tibuok panel sa gibuhat sa senator-judge, apil na ang mga komento ug pagsaway sa publiko.
Apan, matud ni Luistro, wala pa makahimo og pinal nga desisyon o opisyal nga baruganan ang House panel kabahin sa maong kontrobersiyal nga video.
Gipangutana usab ang kongresista kung adunay posibilidad nga ipahibalo sa Senate impeachment court ang maong insidente.
Matud ni Luistro, wala pa’y aktuwal nga posisyon ang House panel bahin niini, apan gihisgutan na kini sa mga prosecutor.
Sa laing bahin, mipadayon ang House panel sa ilang baruganan nga mas angay sundon ang prosecutor-defense nga pamaagi sa pagpresentar sa mga ebidensiya sa nagpadayon nga impeachment trial batok kang Vice President Sara Duterte.
Matud ni Luistro, una nang gipangutana ang House ug Defense panel kung uyon ba sila nga himuon ang presentasyon pinaagi sa prosecutor ug defense kada artikulo.
Sumala niya, mas maayo kini alang sa mga senator-judge ug sa publiko nga nagsunod sa kaso tungod kay mas dali nga ikumpara ang mga ebidensiya ug mga testigo sa duha ka panig.
Kung sundon pa ang naunang pamaagi diin tugotan una ang prosecution nga ipresentar ang tanang artikulo sa impeachment sa dili pa makapresentar ang depensa, posible nga makalimtan na sa publiko ug sa mga senator-judge ang mga unang bahin sa pagtaral.
