Magsumite ang House Prosecution Panel og motion for clarifications ngadto sa Senate impeachment court kalabotan sa ilang kamandoan human nakadesisyon nga i-remand o ibalik ang articles of impeachment alang kang Bise Presidente Sara Duterte ngadto sa House of Representatives diin siya husayon.
Sa dihang miatubang sa media ang House Prosecution panel, si Rep. Gerville Luistro nipahibalo nga tungod kay gusto nilang klaruhon nga dili na nila dawaton ang articles of impeachment sa pagkakaron.
Giila ni Luistro ang tulo ka punto nga gusto nilang katin-awan. Ang prosecution panel miduso og motion seeking clarification sa impeachment court.
Gihangop sa House Prosecution panel ang pag-isyu og summon ngadto kang VP Sara, nga nagtimaan nga buhi pa kaayo ang impeachment trial.
Apan, ang panel nagpadayag sa kalibog sa pag-remand sa Senado, busa nagkinahanglan sila og katin-awan. Sa isyu kon mangayo ba og tabang ang prosecution panel sa Korte Suprema, si Luistro niingon nga sayo pa kaayo para ila kining tukion.
Gikwestiyon usab ni Manila Rep. Joel Chua ang lakang sa Senado tungod kay ang ilang gihimo wala sa ilang mandato. Matod ni Chua, unconstitutional ang lakang sa Senado nga ibalik sa House Of Representatives ang articles of impeachment.
Matud ni Chua nga ang maong lakang lapas sa gahum sa Senado. Giklaro ni House Prosecution Panel Chairman ug minority leader Marcelino Libanan nga co-equal body ang Kamara ug Senado, apan karong panahona nga adunay impeachment trial, ang Kamara ang magsilbing house prosecution panel samtang ang Senado maoy impeachment court.
Matod niya nga tungod sa remand sa Senado, importante usab nga maklaro ang prosekusyon. Gitataw ni Antipolo Rep Romeo Acop nga ilang gitahod ang desisyon sa Senate impeachment court ilabi na nga sila ang magsilbi nga korte ug sila mga piskal.
Gipasalig ni Acop nga isip mga piskal, ilang sundon ang mando sa impeachment court. Giklaro ni Acop nga ang maong komunikasyon gitumong ngadto sa Kamara, busa dili sila ang mga piskal ang angayang motubag.
Tungod sa kalangay sa impeachment trial, ang house prosecution panel nipasalig nga magpadayon sila sa pagpailub. Matod usab ni San Juan City Rep. Isabelle Zamora, nagtuman lang sila sa ilang trabaho subay sa balaod.
