Pormal nang gisumite sa Prosecution ang pipila ka pleadings ngadto sa Senado ug legal counsel sa kampo ni VP Sara Duterte kalabot sa kasong impeachment nga giatubang sa Bise Presidente. Kini ang gikompirma ni House Prosecution Panel spokesperson Atty. Antonio Bucoy.
Matod ni Bucoy nga lakip sa mga pleading nga gisumite sa prosekusyon ngadto sa Senado mao ang sertipikasyon nga ang usa ka tuig nga lagda sa bar sa pagpasaka sa impeachment complaint wala malapas.
Usa kini sa duha ka rekisitos nga gipangayo sa impeachment court gikan sa Kamara human nakahukom nga ibalik sa Kamara ang articles of impeachment.
Nagsumite usab ang prosekusyon og Manifestation kalabot sa Entry of Appearance Ad Cautelam uban ang submission sa entry of appearance sa public prosecutors.
Gipasabot ni Bucoy nga kinahanglang isubmit pag-usab ang entry of appearance sa mga public prosecutors tungod kay sa pagsumite niini sa prosekusyon, wala pa mag-convene ang Senado isip impeachment court.
Kahinumduman nga ang prosekusyon pinaagi sa lead prosecutor nga si House Minority Leader Marcelino Libanan nisang-at sa entry with motion to issue summons nga pinetsahan Marso 14 sa Senado niadtong Marso 25.
Ang kopya sa maong mga pleading gipadala ug nadawat sa Fortun, Narvasa & Salazar Law Offices, nga maoy legal counsel ni VP Duterte.
