Gisiguro ni House Prosecutor ug Bicol Saro Party-list Rep. Terry Ridon nga andam kaayo ang ilang kampo sa pagpresentar sa mga ebidensyang ilang gihuptan batok sa Bise Presidente sa mosunod nga mga adlaw.
Kini human pormal nga giablihan ug gipatawag ang Senate Impeachment Court alang sa paghusay kang VP Sara Duterte.
Gisiguro ni Ridon nga mosunod ang panel sa tanang mando, direktiba, ug legal nga proseso nga ipatuman sa maong impeachment court samtang nagpadayon ang makasaysayanong pagdungog sa Senado.
Sa laing bahin, nanawagan usab ang progresibong Makabayan Bloc nga sugdan dayon ugma ang pagdungog batok kang VP Sara.
Gipasiugda nila ACT Teachers Rep. Antonio Tinio, Gabriela Women’s Party Rep. Sarah Jane Elago, ug Kabataan Rep. Atty. Renee Louise Co nga kini usa ka importante nga konstitusyonal nga lakang padulong sa pagpanubag.
Gilauman sa grupo nga tumanon sa Senado ang ilang katungdanan uban ang seryosong dedikasyon ug paspas nga aksyon.
Matod sa Makabayan Bloc, dugay nang naghulat ang katawhang Pilipino sa mga tubag kabahin sa seryosong mga alegasyon sa korapsyon ug dili regular nga paggamit sa pondo sa gobyerno.
Gipasalig sa mga progresibong magbabalaod nga magpabilin silang mapanid-anon aron masiguro nga patas, transparent, ug naka-focus sa tinuod nga esensya sa mga kaso ang tibuok proseso.
