Gipangandaman na sa House Prosecution panel ang oral arguments nga hisgutan ang isyu sa two-thirds vote threshold sa nagpadayong impeachment trial batok kang Vice President Sara Duterte.
Pagahimoon sa Senate Impeachment Court sa sunod semana ang oral arguments diin giimbitar usab ang mga retiradong mahistrado sa Korte Suprema aron maghatag og klarong pagpasabot sa hustong pagkwenta sa 2/3 vote gikan sa kinatibuk-ang miyembro sa Senado, ilabina sa mga senador nga wala direktang moapil sa impeachment trial.
Sumala kang Atty. Hez Montalan, Deputy Spokesperson sa House Prosecution panel, mainampingong gisusi sa ilang legal team ang tanang may kalabutan nga balaod ug jurisprudence nga ilang ipresentar sa korte.
Gipahayag sa abogado nga pabor ang prosecution panel nga usbon ang denominator gikan sa kinatibuk-ang 24 ka senador ug ilakip lamang ang mga aktibong moapil sa trial, bisan pa man nga respetohon gihapon nila ang mahimong pinal nga desisyon sa impeachment court.
Samtang, gipadayag usab sa House panel ang importansya sa pagpatawag kang Davao City Mayor Baste Duterte human giaprobahan sa impeachment court ang pagpadala og subpoena alang sa iyang pag-atubang sa sunod semana.
Pangutan-on sa panel ang mayor bahin sa mga rekord sa negosyo sa Bise Presidente nga ubos sa Office of the City Mayor, ug giklaro nga ang pagpatawag kaniya gibase sa iyang opisyal nga kapasidad ug walay kalabutan sa ilang relasyon isip managsoon.
