Gipaklaro sa House of Representatives nga wala sila nagsumite og pormal nga reklamo batok ni Vice Pres. Sara Duterte sa Office of the Ombudsman kalabot sa isyu sa giingong sayop nga paggamit sa confidential funds.
Kini ang pamahayag ni House spokesperson Atty. Princess Abante human nga nagpagawas og kamanduan ang Ombudsman nga patubagon si VP Duterte ug ubang opisyal sa mga alegasyon nga gipagawas sa imbestigasyon sa House Committee on Good Government and Public Accountability.
Gibutyag nga ang lakang sa Ombudsman natigayon human nga gidawat ang findings ug rekomendasyon sa maong komitiba kalabutan sa gikaingo nga sayop nga paggamit sa confidential funds sa Office of the Vice President (OVP) ug Department of Education (DepEd) sa panahon nga si Duterte pa ang nagdumala sa maong opisina.
Adunay otoridad ang Ombudsman nga muhimo og inisyatibo sa pag-imbestiga bisan pa walay pormal nga reklamo nga gisumite.
