GENSAN – Nagpadayon ang hot pursuit operation sa sakop sa Polomolok Municipal Police Station batok sa laing upat ka suspek nga nakaikyas human sa natigayong shootout miaging gabii sa Purok Masagana Brgy Pagalungan, Polomolok, South Cotabato.
Kahinumduman nga napatay ang usa sa mga suspek nga nagpangalan ug Benzaid Nilong alias Zaiden Nilong, 32-anyos, residente sa Lapu, Polomolok.
Kini human nakaangkon ug mga samad-pinusilan sa tuo nga siko ug sa likod, nga maoy hinungdan sa iyang hinanaling kamatayon.
Nahitabo matud pa kini human nagpabuto ug armas ang mga suspek sa padulong kanila nga patrolling team, human sila giista niini, hinungdan nga napugos nga mag-retaliate ang mga pulis.
Matud ni South Cotabato Provincial Director Sr Supt. Nestor Salcedo, apil pa ang hepe nila nga si Chief Insp. Alex Orcajada nga migukod sa unang motorsiklo, kung asa nakaangkon matud pa kini ug mga bun-og sa lawas human mibangga sa punuan sa kahoy ang gisakyan niini nga pick-up.
Narekober sa SOCO team sa lugar ang pipila ka mga armas sama sa caliber 45 pistol, ug m16 rifle nga may bala, lakip ang usa ka rifle grenade; mga fired empty shell sa nagkalain-laing armas, ug uban pa.
Kahibaluan nga nadaot usab ang atubangan nga bahin sa patrol car human gipusil sa mga suspek.
