GENERAL SANTOS CITY – Padayon ang hot pursuit sa mga otoridad batok sa suspek nga responsable sa pagdunggab patay sa biktima nga iyaha ra nga kabanay.
Kahinumduman nga wala na nadala sa ospital si Felix Llena, hamtong ang pangidaron nga residente sa Brgy.Nuing, Jose Abad Santos, Davao Occidental human nga nakaangkon ug siyam ka samad dinunggaban sa nagkadaiyang bahin sa lawas.
Giila ni Stell Marie Llena, bayaw sa biktima, ang suspek nga si Bading Estellore. Matud niini, nagkuyog og inum ang duha sa baryo og namalit og barbecue sa ilang pag-uli. Pag-abot sa tulay, gasinggit ang asawa sa suspek og nag-away hinungdan nga gitambagan sa biktima ang mag-asawa nga maghunong.
Apan tungod dili na gustong magpaistorya ang suspek , gipahimungtan niini ang biktima og dayong gidunggab gamit ang kutsilyo.
Pagsaysay sa mga saksi, nabulasot ang biktima sa tulay sa sige ug atras niini dihang nag-iloganay sila og kutsilyo sa suspek. Tungod dili na makabangon ang biktima, didto na kini gisakyan sa suspek ug gidunggab-dunggab hangtud nga mamatay.
Luyo nga nirespondi ang mga Cafgu sa lugar, wala na maabti ang suspek human nga paspas nga nisibat sa lugar og sumala pa nagpdulong sa bukid.
Sa pagkakaron padayon pang giimbestigahan sa kapulisan ang maong insidente.
