Gikumpirma sa hostile witness nga si kanhi Office of the Vice President (OVP) Special Disbursing Officer (SDO) Gina Acosta sa iyang opisyal nga testimonya nga si VP Sara Duterte ang mimando kaniya nga ihatag ang ₱125 milyong confidential funds kang Col. Raymund Dante Lachica.
Gihimo ni Acosta ang maong pagbutyag atubangan sa Senate Impeachment Court sa ika-16 nga adlaw sa impeachment trial batok kang VP Sara.
Matud ni Acosta sa iyang testimonya, human niya ma-encash o mapalit ang tseke para sa confidential funds, gitawagan dayon niya si Col. Lachica.
Sa dihang gipangutana kung nganong iyang gihimo kini, mao kini ang iyang pahayag: “Ang nag-utos kanako nga i-release ang ₱125M nga kwarta ngadto sa security officer nga si Colonel Lachica mao si Ma’am Sara Duterte.”
Si Col. Lachica mao ang kanhi hepe sa Vice Presidential Security and Protection Group (VPSPG).
Gipadayag usab ni Acosta ang duha ka rason nganong iyang gihatag ang confidential funds kang Col. Lachica. Una, tungod kay mimando niini si VP Sara isip Head of Agency; ug ikaduha, si Lachica ang eksperto sa pagpatuman sa confidential operations sa OVP.
Gipangutana usab ni Trial Presiding Officer Francis “Chiz” Escudero kung trabaho ba sa security officer ang paggasto sa confidential fund nga gidisburse ni Acosta isip Special Disbursing Officer.
Mitubag si Acosta og “dili,” tungod kay trabaho kini sa SDO. Apan matud niya, sa higayon nga ma-release na ang kwarta, katungdanan sa security officer ang pagsumite og utilization report isip pamatuod nga napadayon ang confidential activities.
Samtang, gimandoan ni Trial Presiding Officer Francis “Chiz” Escudero si Acosta nga mobalik ugma, Agosto 18, aron mopadayon sa iyang testimonya ubos gihapon sa maong subpoena.
