GENERAL SANTOS CITY – Gisugdan na sa Comelec ang paghatag ug honoraria sa mga magtutudlo nga nahimong miyembro sa electoral board nga nagserbisyo sa natigayong eleksyon kaniadtong Lunes.
Ug gani, daghan sa mga magtutudlo ang nalipay human nga cash mismo ang ilang nadawat ug wala na gipaagi sa cash card.
Kahibaluan nga subay sa Election Service Reform Act, ang usa ka EB chairperson makadawat ug honoraria nga mukabat sa P6,000; EB Members, P5,000; DepEd Supervising Officer (DESO), P4,000 ug DESO Support Staff, P2,000.
Una nang gipasalig sa Comelec nga dili buhisan ang honoraria sa mga magtutudlo nga nagserbisyo sa piniliay.
Gawas sa nadawat nga honoraria, nadawat na usab matud pa sa mga magtutudlo ang ilang mid-year bonus ug increase sa ilang sweldo, samtang sunod semana usab ma-release ang ilang sweldo.
Una nang gibutyag sa Comelec 12 ug sa kapulisan nga nahimong generally peaceful ang pagpahigayon sa eleksyon dinhi sa rehiyon.
