GENERAL SANTOS CITY – Bisan sulod sa panimalay sa panahon sa curfew hours sa dakbayan, hugot na usab gibawal ang pagpahigayon og panagtapok ug “tagay” sessions.
Kini subay sa bag-ong Executive Order No. 13 ni Mayor Ronnel Rivera.
Nakalatid ang probisyon nga gawas sa mga balay-kalingawan, dili exempted ang “home gatherings” hilabi na kung adunay inum-inom sa gipatumang liquor ban og curfew nga magsugod alas 12:00 sa tungang gabie hangtod alas 4:00 sa kaadlawon.
Samtang gipaniguro ni P/Major Rissa Hernaez, ang tigpamaba sa General Santos City Police Office, nga istrikto nilang ipatuman ang maong curfew hours ug liquor ban, subay sa kamanduan sa lokal nga panggamahanan.
Gihangyo usab sa opisyal ang mga gapanag-iya sa mga establisyemento hilabi na ang mga beach resorts, nga mokooperar sa pagtuman sa maong mga health protocol, taliwala sa padayong bahad sa pandemiya.
