Nawad-an na og dakong kantidad sa pondo ug nag-atubang sa posibleng dakong pagkapukan ang lokal nga industriya sa pag-atiman og baboy sa Pilipinas.
Tungod niini, pormal nang nanawagan karong Biyernes ang mga grupo sa mga magbababoy alang sa dinaliang pagpataas sa taripa ug temporaryong paghunong sa pag-import og karne.
Sa ‘joint manifesto’ sa alyansa sa mga lokal nga magbababoy, ilang gibutyag nga miubos na sa P90 hangtod P120 matag kilo ang presyo sa ‘liveweight’ sa ‘farmgate’, samtang padayon usab ang pagsaka sa presyo sa pagkaon sa mga baboy.
Tungod niini, nalugi ang mga magbababoy og hangtod P9,000 sa matag baboy nga ilang giatiman.
Tungod sa maong sitwasyon, gihangyo sa grupo ang dali nga pagbalik sa ‘import tariff’ nga 40 percent alang sa ‘out-quota’ ug 30 percent alang sa ‘in-quota’.
Lakip usab sa ilang gipangayo ang temporaryong pagdili sa pag-import og karne, pagpahunong sa pagpagawas sa ‘frozen imported pork’ gikan sa mga ‘cold storage’, ug 100 percent nga inspeksiyon sa ‘quarantine’ sa mga pantalan.
Samtang, misang-at usab si Senador Francis Pangilinan og Senate Resolution 726 aron imbestigahan ang krisis sa sektor sa ‘livestock’ ug ‘poultry’. Sumala sa senador, gibanabana nga mokabat sa P250 milyon matag adlaw ang kalugi sa mga lokal nga magbababoy tungod sa ubos kaayong ‘farmgate price’ kon itandi sa ‘production cost’ nga mokabat sa P180 hangtod P190 matag kilo.
Dugang pa sa senador ug sa mga grupo sa industriya nga kon dili dayon masulbad ang maong problema pinaagi sa tukmang taripa ug proteksiyon sa lokal nga produksyon, daghang magbababoy ang mapugos sa paghunong sa ilang negosyo.
Mahimong mosamot ang pagsalig sa nasud sa imported nga karne ug mameligro ang seguridad sa suplay sa pagkaon sa Pilipinas.
