GENERAL SANTOS CITY – Subli nga nagbangga ang managlahi nga legal nga baruganan nilang City Councilors Khan Balleque ug Dominador Lagare Jr. atul sa regular nga sesyon sa Konseho.
Human giduso ni Konsehal Balleque ang ikaduha nga resolosyon aron ipa revoke kang Gensan Mayor Lorelie Pacquiao ang pagbawi niini sa gipagawas nga Executive Order number 1.
Kini human giaprubahan kaniadtong Agusto 16 ang unang resolosyon nga ipa revoke sa Mayor ang EO number 1 nga napasa sa miaging sesyon sa 20th regular Council.
Kini human gibarugan subli ni Konsehal Balleque nga peligro ang gihimo sa Mayor nga pagpasulod sa mga baboy gikan sa mga lugar nga positibu sa African Swine Fever nga gikonsidera sa Bureau of Animal Industry nga red zone.
Gani gihagit pa niini ang kauban nga Konsehal nga dad-on sa korte ang naasoy nga hisgutanan aron “magkaalaman na” matud pa.
Gikwestyon usab niini si Konsehal Lagare kung konsehal ba kini o tigpamaba sa Mayor human ang nahisgutang Konsehal maoy nagpagawas ug pahayag nga dili makig head on ang Mayor sa giaprubahan nga resolosyon sa nakalabay nga sesyon.
Gipanawagan usab ni Kagawad Balleque ang mga swine raiser nga mag lobby sa Sangguniang Panglungsod tungod andam kini nga mutabang aron ma ammend ang usa ka section sa gipirmahan nga Executive Order ni Mayor Pacquiao.
