GENERAL SANTOS CITY – Nakaplagan sa mga otoridad ang mga hinagiban nga giputos sa nagkadugo nga sinina nga posibleng gigamit sa pagpatay sa 7-anyos nga batang babae sa brgy. Conel.
Sumala pa nga posibleng mao kini ang gigamit sa responsable sa pagpatay sa batang babae nga si Princess Arian Cabucos nga unang gikataho nga upat na ka adlaw nga missing ug nakit-an sa bakanteng luna sa Brgy. Conel ning dakbayan kagahapong adlawa, Marso 13, 2024 nga gisulod ug sako ug anaa na sa state of decomposition.
Kahinumdoman nga alas 11:43 sa buntag kagahapon Marso 13, 2024, nakadawat og tawag ang buhatan sa police station 9 gikan sa usa ka concerned citizen nga adunay giingong Nakaplagang Patay nga Lawas sa Purok Malinawon, Barangay Conel, General Santos City. Diha-diha, ang Patrol team nga gipangulohan ni PMAJ ROBERT B FORES kauban ang duty investigator niresponde sa nasangpit nga lugar aron pamatud-an kung katinuod ang maong taho. Sa pag-abot sa lugar , nakumpirma nga patayng lawas ang gisulod sa usa ka puti nga sako. Nag-request gilayon ang maong buhatan sa Regional Forensic Unit-12 (RFU-12) nga maproseso ang crime scene ug positibo nga giila ang lawas sa biktima nag mao ang nawala nga si Princess Arian Cabucos, 7 anyos, kinsa gikatahong missing niadtong Marso 10, 2024.
Mga alas 4:00 sa hapon kagahapon Marso 13, 2024, nadiskubrehan sa mga imbestigador ang usa usab ka sako nga adunay duha (2) ka kutsilyo nga ginagamit sa kusina, usa (1) ka polo shirt nga kolor yellow ug usa ka T-shirt nga kolor puti nga nahimutang sa likod nga bahin sa balay ni Mr. Ermilendo Sajul Sajulga, 74 anyos, ulitawo, kapin o kulang 200 metros gikan sa crime scene ug kapin o kulang 10 metros gikan balay sa biktima.
Sa pagdagan sa imbestigasyon sa kapulisan ang 74-anyos nga lalaki ang gitudlo ma usab ug person of interest base usab sa mga testimonya sa silingan sa biktima. Ang maong 74-anyos nga lalaki dili ang amahan sa bata nga una usab nga gitudlong POI.
Ang mga nakuhang ebidensiya gipaubos sa DNA examination.
Sa karun gipasalig ni PMAJ ROBERT B. FORES, labaw sa police station 9 nga dili sila mohunong aron nga mapatubag sa balaod ang responsable sa krimen.
