GENERAL SANTOS CITY – Gikatakang mubalhin ug lugar ang Team Pacquiao alang sa pagpahigayon ug high altitude training ni Sen. Manny Pacquiao.
Kini human gisugdan ang high altitude training ni Pacquiao miaging semana, nga gipahigayon sa Tinoto, Maasim, sa may boundary sa GenSan ug Sarangani.
Sa pakighinabi sa Bombo Radyo, gibutyag ni Head Coach Buboy Fernandez nga ning higayuna ibalhin ang high altitude training nila sa Glan, Sarangani.
Ug gani, na-inskpeksyon na matud pa ni Coach Buboy ang lugar, kung asa mas maayo ug eksakto nga daganan ang naasoy’ng bag-ong lokasyon, ug mas nipis ang oxygen, nga maayo alang sa pagpakondisyon ni Pacquiao.
Matud pa nga daw sa sikreto ang kanindot sa lugar nga matandi sa Hollywood.
Kahibauan nga kagahapong adlawa, gawas sa walo ka rounds nga sparring sessions, mipailawom usab si Pacquiao sa upat ka rounds sa punch mitts kauban si Fernandez.
Ug gani, gumikan sa kakusog sa kinumo ni Manny, daw sa gakurog ang mga kamot ni Coach Buboy human ang punch mitts.
Una nang gibutyag sa Bombo Radyo ni Fernandez nga lauman nga dugangan pa ug pipila ka rounds ang sparring sessions sa sunod semana, nga posibleng musaka sa 10, hangtod nga makaabot ug 12.
