Nakabreak og Guinness World Record ang Conagra Brands human makahimo og pinakataas nga meat snack gamit ang Slim Jim nga may gitas-on nga 429 feet ug 5.4 inches o kapin 130 meters sa Nebraska, Estados Unidos.
Gipadayag ang higanteng Slim Jim niadtong Septiyembre 9 sa campus sa Conagra sa Omaha ug gikumpirma kini sa Guinness World Records adjudicator nga bag-ong world record holder.
116 feet o kapin 35 meters ang labaw niini sa miaging rekord alang sa pinakataas nga meat snack.
Sumala sa “Blaze Crew” nga naghimo sa higanteng Slim Jim, gisiguro nila nga parehas ra ang recipe ug flavor niini sa ordinaryong Slim Jim.
Sa wala pa kini ipakita, giputos una ang Slim Jim palibot sa usa ka dako ug movable nga wire rack, sa wala pa hinay-hinay nga gibuklad sa taas nga linya sa mga lamesa nga gitapok sa parking lot.
Matud ni Conagra Brands Senior Vice President for Research and Development Jess Sweley, ang rekord usa ka pagpakita sa pagkamamugnaon, kahibalo ug dedikasyon sa ilang team, ug usa usab ka espesyal nga paagi aron sa pagsaulog sa ilang kadasig sa pagbag-o ug pagmugna.
